تاند ( یک شنبه، د جوزا ۲۳) د ننګرهار په مرکز جلال آباد ښار کې یو شمېر مېرمنو د نظام، امنيتي ځواکونو او سولې په ملاتړ سوله ييز لاريون ترسره کړ.
د لاریون ګډونوالو مېرمنو له ځانه سره د نظام او سولې په ملاتړ شعارونه لېږدول.
دوی په یوه غږ سره له نظام او امنيتي ځواکونو د ملاتړ غږونه کول او له وسله والو طالبانو يې وغوښتل چې جګړه ودروي او د سولې لار غوره کړي.
لاریونوالو مېرمنو وویل: «مونږ د خپلو امنيتي ځواکونو ملاتړ کوو او ترڅنګ يې ولاړ يو، دوی دي چې مونږ يو، مونږ سوه غواړو او جګړه دې ژر تر ژره ودرول شي.»
ننګرهاریو مېرمنو دغه راز د ژر اوربند غوښتنه هم کوله.
دوی د جګړې له ښکېلو خواو وغوښتل چې لومړی اوربند او بيا د سولې خبرې پرمخ يوسي ترڅو د افغان وژنې مخنیوی وشي.
ننګرهارکې مېرمنې داسې مهال سوله ییز لاریون کوي، چې په دې وروستیو کې په هېواد کې جګړې تر بل هر وخت زور اخیستی او په کې د جګړې د ښکېلو لوریو ترڅنګ ولسي خلکو ته هم ډېره مرګ ژوبله اوړي.