تاند- د امریکا ولسمشر جو بایډن پر ټیک ټاک هغه بندیز پای ته ورساوه چې پخواني ولسمشر ډونالډ ټرمپ لګولی و.
د ټیلګراف ورځپاڼې د راپور له مخې، د امریکا ولسمشر جو بایډن د مخکیني ولسمشر د حکم د لغوه کولو ترڅنګ نوی درې نورې پرېکړې کړي دي.
ښاغلي بایډن د امریکا د سوداګرۍ وزارت ته امر کړی چې د بهرنیو کمپنیو په اړه پلټنې وکړي او وګوري چې د متحدو ایالتونو ملي امنیت ته خطر لري او که یې نه لري.
د بایډن د دې نوي حکم معنا دا ده چې هر ډول راکړه ورکړه به په ځیر څېړل کېږي. دا په داسې حال کې ده چې په امریکا کې بېلابېلو محکمو د ټیک ټاک په اړه د دونالډ ټرمپ د پرېکړې په اړه منفي فیصله کړې وه.
خو د بایډن حکومت هیله لري چې اقدام به یې په محکمو کې رد نه شي.