تاند ( چهارشنبه، د جوزا ۱۲ مه) د ننګرهار امنیتي چارواکي وایي، د دغه ولایت په پچیراګام او هسکه مینه ولسوالیو کې د افغان ځواکونو د هوایي او توپچي بریدونو په ترڅ کې چې نن تر سره شوي ۱۴۲ طالبانو ته مرګ ژوبله اوښتې ده.
د دغه ولایت د رسنیو له دفتر څخه په خپره شوې خبرپاڼه کې راغلي چې د هسکې مینې او پچیراګام ولسوالیو په مربوطاتو کې نن ورځ د هوایي او توپچي بریدونو په پایله کې د ګڼ شمېر پاکستانیانو په ګډون ۹۲ وسله وال طالبان وژل شوي او ۲۴ نور ټپیان دي.
د معلوماتو له مخې په هسکه مینې ولسوالي کې ۲۲ وسله وال طالبان وژل شوي او ۲ نور ټپیان دي.
خبرپاڼه وایي، همدا راز د پچیراګام ولسوالي په ګیره خېلو او د تورې بوړې په ناصرو، شینکۍ او ګنداو سیمو کې د نن ورځې هوایي او ځمکنیو بریدونو په پایله کې د درې سرګروپانو په ګډون ۷۰ وسله وال طالبان وژل شوي او ۲۲ نور ټپيان دي.
د ننګرهار ولایت مقام ادعا کوي چې په وژل شویو او ټپيانو کې یې اکثریت پاکستاني اتباع دي.
سرچینه کاږي، وژل شوي سرګروپان انصارالله اورګزی، سپینی او یوسفي نومیږي چې د هوایي برید په پایله کې وژل شوي دي.
د سرچینې په وینا، د وسله والو مخالفینو له حضور څخه د سیمې د پاکولو په موخه اوس هم بریدونه جریان لري.
د ننګرهار امنیتي چارواکي داسې مهال طالبانو ته د دغه مرګ ژوبلې د اړولو ادعا کوي چې نن سهار شاوخوا لس بجې د جلال اباد ښار څلورمې ناحیې مربوطاتو کې د ملي امنیت ځانګړو ځواکونو پر موټریز کاروان موټر بم برید تر سره شو.
د ملي امنیت له ۰۲ قطعې څخه په خپره شوې خبرپاڼه کې راغلي چې د دغه برید اکثریت قربانیان ملکي وګړي وو.
خبرپاڼه وایي، په دغه ترسره شوي برید کې دوه تنه ملکي وګړي ووژل شول او د دریو سرتېرو په ګډون ۱۴ تنه ملکي وګړي ټپیان شول.