تاند( دوشنبه، د جوزا ۳۱) په کونړ ولایت کې د ښځینه لاسي صنایعو لپاره یو ورځنی نندارتون پرانیستل شو.
دا نندارتون د کونړ ښځو چارو ریاست په همکارۍ د ښځینو اقتصادي پياوړتیا تر سرلیک لاندې جوړ شوی دی.
په دې نندارتون کې د ښځینه وو په لاس جوړ شوي بېلابېل لاسي صنایع نندارې ته وړاندې شول.
د کونړ د ښځو چارو ريیسه سهیلا بابر وایي، له دې نندارتون څخه یې موخه د مېرمنو لاسي صنایعو ته بازار موندنه ده.
د نوموړې په وینا د ښځو د فعالیتونو پراختیا پر وړاندې اوس هم ټولنيز او کلتوري محدودیتونه شته چې دوی ترې ځورېږي
هغې رامنځته شوي پرمختګونه د موجوده نظام ثمره یاده کړه او هیله يې وښوده چې ښځینه قشر به د کورني اقتصاد په پیاوړتیا، د هېواد ابادۍ او پرمختګ کې د نارینه وو ترڅنګ فعال رول ولوبوي.
بل لورته کونړۍ مېرمنې هم خوښې دي، چې لاسي توکو ته یې د بازار موندنې هڅې ګړندۍ شوي.
دوی وایي، دا ډول نندارتونونه کولای شي، چې د دوی اقتصادي وضعه ښه او لا یې ډېر کار ته وهڅوي.