تاند — د هرات والي وايي په دغه ولایت کې د خواف – هرات رېل پتلۍ د ساتونکو په موټر د سړک د غاړې ماین چاودنه شوې چې له امله یې شپږ ساتونکي وژل شوي دي.
د والي سید وحید قتالي په خبره دغه پېښه پرون ناوخته مازیګر مهال د هرات – اسلام قلعه په لویه لار رامنځته شوې.
د رېل پټلۍ ادارې هم په یوه خبرپاڼه کې دا خبر تایید کړی وايي، د ټولګټو پروژو د کارکوونکو او ساتونکو په نښه کول یو ستر بشري او د نه منلو وړ جنایت دی.
تر دې وړاندې هم د یادې رېل پټلۍ او دغه راز د نورو عامه تاسیساتو ساتونکو باندې ورته چاودنې او وسله وال بریدونه شوي دي.