تاند(شنبه، د جوزا ۷) پاکستان ادعا کوي چې د دغه هیواد د طالبانو د تحریک یو مرکزي مشر مُفتي خالد د افغانستان په کونړ ولایت کې وژل شوی دی.
پاکستاني رسنۍ وايي، مفتي خالد په داسې حال کې چې له یوې سیمې بلې ته روان و، د نامعلومو کسانو له لوري ووژل شو.
د مفتي خالد د وژل کېدو خبر وروسته له دې خپرېږي چې په یوه بل راپور کې وویل شول چې د کندهار په عینو مېنه کې نامعلومو ترهګرو یو بلوڅ بېلتون غوښتونکی وژلی دی.
د افغانستان حکومت په کندهار کې د عبدالنبي بنګلزي د وژل کېدو په اړه څه نه دي ویلي.
تر دې وړاندې هم په کندهار کې پر یو شمېر کډوالو بلوڅانو دې ته ورته بریدونه شوي دي.
د امریکايي پوځیانو له وتلو سره په افغانستان کې د پاکستان رول مخ پر زیاتېدو دی. دویچې ویلې پرون په یوه راپور کې وویل چې د پاکستان په ښارونو او کلیو کې په ښکاره د افغانستان جګړې ته ځوانان بلل کېږي او همداراز چنده ورته ټولېږي.
د پاکستان اج تلویزیون وايي، مفتي خالد، چې اصلاً د بونیر اوسېدونکی و، د پاکستاني طالبانو د تحریک د شورا غړی او له ملافضل الله سره نژدې کس و.
د مفتي خالد د وژل کېدو په اړه افغان چارواکو تراوسه څه نه دي ویلي.
د پاکستان طالب د پاکستان خاص مخبران دی! د افغانستان دولت یې باید تر ټولو د مخه له منځه یوسی!