تاند(جمعه، د جوزا ۶) د ناټو سرمنشي ینس ستولتنبرګ وايي، ناټو نژدې دوې لسیزې د افغانستان له امنیت سره مرسته وکړه خو اوس د افغانستان حکومت او افغان امنیتي ځواکونه په کافي اندازه پیاوړي دي چې د نړیوالو ځواکونو له ملاتړه پرته پر خپلو پښو ودرېږي.
ناټو په ۲۰۰۳ م کال د امریکا له بریده دوه کاله وروسته په افغانستان کې د امنیتي چارو مسوولیت په غاړه واخیست.
ستولتنبرګ د پنجشنبې په ورځ اسوشیتید پریس خبري اژانس ته په مرکه کې وویل:
«زه فکر کوم چې افغانان هم پوهېږي چې موږ د دوی په هیواد کې نژدې ۲۰ کاله وو او موږ په افغانستان کې هم ډېرې وینې توی کړي او هم مو ډېرې پیسې لګولي. افغانستان اوږد مزل کړی، هم د قوت له نظره او هم د امنیتي ځواکونو د ظرفیتونو له پلوه، په ټولنیزو او اقتصادي برخو کې یې هم ډېر پرمختګ کړی دی. باید یو وخت په خپله افغانانو په خپل هیواد کې د سولې او ثبات مسوولیت په غاړه اخیستی وای.»
ستولتنبرګ وویل، د ناټو غړي هیوادونه به د ملکي متخصصانو له لارې، چې د افغانستان وزارتونو ته مشورې ورکوي، د افغانستان ملاتړ ته دوام ورکړي.
ده همداراز وویل چې ناټو به د افغان امنیتي او دفاعي ځواکونو مالي مرستې او له طالبانو سره د سولې د خبرو ملاتړ ته دوام ورکړي.
د ناټو سرمنشي دا هم وویل چې ناټو په دې امکان هم غور کوي چې له افغانستانه دباندې د افغان امنیتي ځواکونو روزنې ته دوام ورکړي خو په دې برخه کې وروستۍ پرېکړه لا نه ده شوې.