تاند(پنج شنبه، د جوزا ۶) د ملګرو ملتونو د بشري حقونو عالي کمیساري ویلي، چې پر غزې د اسراییل بریدونه ښایي جنګي جنایت وبلل شي.
د دغه سازمان په وینا، د دوی د څېړنو له مخې، تر اوسه پورې یې هیڅ داسې شواهد نه دي موندلي چې وښیي اسراییل دې پر غزې بمبارۍ کې ترهګر په نښه کړي وي.
یاد سازمان څرګنده کړې، د دوی موندنې ښیي چې اسراییل په غزه کې د ترهګرو په نوم ملکیان په نښه کړي دي او دا مسئله کېدای شي جنګي جنایت وبلل شي.
د ویلو ده چې څه موده مخکې اسراییل پر غزې مرګونې بمباري وکړه او په پایله کې یې ګڼو ملکي وګړو ته د مرګ ژوبلې اوښتو ترڅنګ درانه اقتصادي زیانونه واوښتل.
د یادونې ده چې دوه ورځې وړاندې د امریکا د بهرنیو چارو وزیر انټوني بلینکن ویلي چې نړیواله ټولنه به وهڅوي څو له غزې سره مرسته وکړي.
نوموړي د اسراییل له لومړي وزیر بنیامین نتانیاهو سره تر لیدنې وروسته ویلي چې امریکا به په غزه کې د ناوړه بشري وضعیت د ښه کېدو لپاره خپلو هلو ځلو ته دوام ورکړي.
نوموړي زیاته کړې چې دوی به د خپلو متحدینو په ګډون له غزې سره مرسته وکړي او دغه راز امریکا غواړي ډاډ تر لاسه کړي چې حماس ډله به له یادو مرستو ګټه نه تر لاسه کوي.
د ویلو ده چې په غزه کې تېره اوونۍ اوربند وشو خو تر هغه وړاندې اسراییل پر غزې خونړۍ بمباري وکړه چې د ټولې اسلامي نړۍ توند غبرګونونه یې را وپارول.