تاند ( سه شنبه، د جوزا ۴مه) د ناټو عمومي منشي ینس سټولټنبرګ د استونیا له لومړۍ وزیرې کاجه کلاس سره یوې ګډې خبرې غونډه کې چې له افغانستان څخه د بهرنیو ځواکونو د وتلو په اړه يې خبرې کولې وویل، دوی له افغانستان څخه د ځواکونو د وتلو په اړه له خپلو متحدینو سره پوره همغږي لري.
سټولټنبرګ وویل، دوی به د یو منظم پلان له مخې ټول سرتېري له افغانستان څخه وباسي خو ټینګار یې وکړ، چې ناټو به له افغانستان سره خپلو همکاریو ته دوام ورکړي.
د ناټو عمومي منشي زیاته کړه، چې دوی به د افغانستان له خلکو سره یو ځای په دغه هېواد کې د تلپاتې سولې لپاره هلې ځلې کوي.
سټولټنبرګ ډاډ ورکړ، چې د افغان امنیتي او دفاعي ځواکونو دوامداره روزنه او ملاتړ به کوي.
سټولټنبرګ داسې مهال یو ځل بیا خپله ژمنه تازه کړې، چې بل لورته نشنل انټرسټ خپرونې له افغانستان څخه د امریکایي ځواکونو وتلو ته په اشارې ویلي، چې له دغه هېواد څخه د امریکایي ځواکونو وتل او دغه راز په هر بل ګاونډي هېواد کې د تاسیساتو جوړول به د متحده ایالاتو واک کمزوری کړي.
سرچېنې زیاته کړې، امریکا تل هڅه کړې ده په سیمه کې د روسیې او چین د نفوذ مخه ونیسي خو د ځواکونو د وتلو په اړه د بایډن پرېکړه به دغو دوو هېوادونو ته د لا ډېرې لاسوهنې او پرمختګ زمینه برابره کړي.
د سرچینو په حواله که څه هم امریکا هڅه کوي د منځنۍ اسیا هېوادونه هم له ترهګرۍ سره مبارزه کې شریک کړي خو زیاتوي دا چاره تر ډېره عملي نه ښکاري.
نشنل انټرسټ خپرونې د خپلې لیکنې په وروستۍ برخه کې ویلي، چې په ټوله کې د ځواکونو وتل به تر افغانستان امریکا ډېره زیانمنه کړي.