تاند ( سه شنبه، د جوزا ۴مه) د ننګرهار کرنې ریاست مسوولان وايي، چې په دې ولایت کې به د اټکل له مخې د غنمو سږني حاصلات نږدې ٢۰۰ زره ټنو ته ورسېږي.
د کرنې رییس انعام الله ساپی زیاتوي، چې سږکال د دې ولایت په ۶۸زره او ۸۶۰ هکټاره ځمکه غنم کرل شوي دي، چې له دغو کروندو څخه به د اټکل له مخې ۱۹۲ زره او ۴۶۹ مټریک ټنه غنم ترلاسه شي.
د ساپي په خبره، تېر کال یې په دې ولایت کې د غنمو ٦٥٢ ټنه اصلاح شوي تخمونه ویشلي، چې ورسره سږ کال په حاصلاتو کې د پام وړ زیاتوالی راغلی دی.
نوموړی وایي د دې ترڅنګ یې د کتار په ډول د غنمو د کرکېلي دودول، د ناروغیو او افاتو په تړاو عامه پوهاوی او د اوبه خور د مناسبو وختونو پیژندنې په اړه بزګرانو ته روزنه د دې لامل شوې چي په حاصلاتو کې زیاتوالی راشي.
د کرنې ریاست د معلوماتو له مخې تېر کال د ننګرهار په ۶۹ زره او ۲۶۲ هکټاره ځمکه غنم کرل شوې وه، چې له دغو کروندو څخه څه باندې ۱۹۰ زره او ۹۰۱ مټریک ټنه غنم ترلاسه شوې وه .