تاند ( دوشنبه، د جوزا ۴ مه ) د صنعت او سوداګري وزارت چارواکي وایي، د هرات ولایت د طبي بوټو په صادراتو کې د پام وړ زیاتوالی راغلی دی.
د دغه وزارت ویاند فواد احمدي وایي چې سږ کال د هرات د طبي صادراتو کلنۍ کچه تر ۴۰ میلیونه ډالرو لوړه شوې ده.
هغه زیاتوي، د هغې احصایې له مخې چې د هرات د سوداګرۍ او پانګونې خونې له خوا ترسره شوې، په ۱۳۹۹ کال کې له دغه ولایت د طبي بوټو د صادراتو کچه د تېر کال پرتله ډېره شوې ده.
د احصايې له مخې، په ۱۳۸۸ لمریز کال کې له هرات ولایت څخه د طبي بوټو صادرات نږدې شل زره ټنو ته رسېدل چې ۲۱ میلیونه امریکایي ډالر ارزښت یې درلود.
د دغو د معلوماتو په اساس، په ۱۳۹۹ لمریز کال کې د دغو بوټو صادرات ۳۶زره ټنه ته لوړ شوي چې ۴۰ میلیونه امریکايې ډالر ارزښت لري.
په یادو طبي بوټو کې توره او سپینه زیره، کُنځلې، خاکشیر، د ریحان تخم او نورې طبي ګیاوې او بوټي شامل دي چې ډېری یې ترکیې، هند اروپایي او عربي هېوادونو ته صادریږي.