تاند ( یک شنبه، د جوزا ۲مه) د هند سوداګریز لیګ څوارلسم پړاو پاتې لوبې په عرب متحده اماراتو کې ترسره کېږي.
یاد لیګ څه موده وړاندې د کورونا ویروس د خپرېدو له وېرې وځنډېده.
هندي رسنۍ د آی پي اېل د مسوولان له قوله لیکي، چې د یادو لوبو ۳۱ لوبې پاتې دي او د ترسره کېدو په اړه به یې د هند کرکټ بورډ راتلونکې اونۍ رسمي اعلان وکړي.
هندي رسنۍ وایي، چې یادې لوبې به د سپتمبر او اکتوبر میاشتو کې ترسره شي.
د یادونې ده چې له دې وړاندې د پاکستان کورنی لیګ هم د کورونا له امله ځنډېدلی دی.
تازه پاکستاني رسنیو ویلي، چې د پاکستان سوپر لیګ د شپږم پړاو پاتې لوبې د متحده عربي اماراتو په ابوظهبي کې ترسره کېږي، چې د جون په پنځمه نېټه به پيل شي.
راشد خان چې په دغه سیالیو کې د لاهور قلندرز لوبډلې لپاره لوبېده، د یاد لیګ د پیل په لومړنیو څو لوبو کې ولوبېده او بېرته راستون شو، نوموړی اوس د پاتې لوبو لپاره یو ځل بیا د لاهور قلندرز لوبډلې سره یو ځای شوی دی.