تاند (شنبه د جوزا ۱) هلمند کې په تېرو دوو ورځو کې د جګړو له امله د خلکو د غنمو څلور کروندې په بشپړ ډول سوځېدلي دي.
د راپورونو له مخې، د غنمو دغه کروندې تېره شپه د عینک په سیمه کې د مرمیو لګېدو له امله سوځېدلي دي.
د هلمند د کرنې ریاست مسؤلینو ویلي، تراوسه د جګړو له امله د ملکي وګړو څو جریبه ځمکه سوځېدلې چې خروارونه غنم هم په کې د لمبو ښکار شوي.
هلمند کې له تېرو یوې میاشتې راهیسې جګړې زیاتې شوي چې عامو خلکو ته یې درانه مالي او ځاني زیانونه اړولي دي.
هلمند د افغانستان له جنوبي ولایتونو هغه ولایت دی چې هر کال په زیاته پیمانه غنم په کې تولیدیږي.