تاند(جمعه، د ثور۳۱) د امریکا فدرالي حکومت او استخباراتي ادارې وايي، طالبانو له القاعده شبکې سره نژدې اړیکې ساتلي او غالباً پر ګڼ نفوسو مرکزونو او د افغانستان د حکومت پر تاسیساتو پراخو بریدونو ته تیاري نیسي.
د ډیفینس اټلجینس (دفاعي استخباراتو) ادارې د راپور له مخې، په داسې حال کې چې د امریکا متحد ایالتونه له طالبانو سره پر خپلې موافقې غور کوي، القاعده شبکه ښايي د طالبانو نورو لارښوونو ته انتظار باسي.
راپور وايي«القاعده د ځان ساتلو لپاره پر طالبانو اتکا کوي او داسې ښکاري چې د دغو دوو ډلو ترمنځ، چې دوې لسیزې پخوا یې په خپل منځ کې اړیکې جوړې کړې، درز اسانه نه دی.»
د دفاعي استخباراتو (DIA) وروستی درې میاشتنی راپور د سې شنبې په ورځ د امریکا د استازو جرګې د بهرنیو اړیکو کمېټې ته د افغانستان لپاره د امریکا د ځانګړي استازي زلمي خلیلزاد له څرګندونو سره په یو وخت خپور شو.
خلیلزاد د استازو جرګې د بهرنیو اړیکو کمېټې ته وویل چې طالبانو د موافقې ډېر شرطونه عملي کړي دي.
د لانګ ژورنال خپرونې د راپور له مخې، په افغانستان کې د امریکا د دفاع وزارت د سرمفتش دفتر وايي چې خلیلزاد دا ادعا د کوم مثال له وړاندې کولو پرته کړې دي.
دا خپرونه همداراز وايي، له کله چې امریکايي پوځیانو له افغانستانه په وتلو پیل کړی دی، طالبانو حملو ته زور ورکړی دی.