تاند ( چهارشنبه، د ثور ۲۹مه) د افغانستان او اسټرالیا ترمنځ د یوازینۍ ټېسټ لوبې رسمي نېټه اعلان شوه.
افغان کرکټ بورډ وایي، چې دغه ټېسټ لوبه به د روان ۲۰۲۱م کال د نومبر میاشتې په ۲۷ مه نېټه پيل او د ډسمبر تر لومړۍ نېټې به دوام وکړي.
سرچینه وایي، چې دا لوبه د اسټرالیا د هوبارټ ښار په بلن سټون کرکټ لوبغالي کې ترسره کېږي.
د سرچینې په خبره دا د افغانستان لومړۍ ټېسټ لوبه ده، چې د اسټرالیا پر وړاندې به یې ترسره کوي.
د کرکټ بورډ مشر فرهان یوسفزی وایي، اسټرالیا د کرکټ په نړۍ کې یو له غوره لوبډلو څخه ده او په خبره یې دا لوبه د افغانستان لپاره خورا مهمه ده.
د یادونې ده چې د افغانستان او اسټرالیا ترمنځ دغه ټېسټ لوبه ټاکل شوې وه د تېر ۲۰۲۰م کال په پیل کې ترسره شي؛ خو د کورونا وبا د محدودیتونو له امله وځنډول شوه.