تاند ( سه شنبه، د ثور ۲۸مه) د مېکسیکو یوې پېغلې اندریا میزا د (مس یونیورس ۲۰۲۱) کال د ښکلا جایزه وګټله.
هغه د څو نورو نجونو په منځ کې لومړی مقام خپل کړی او تاج يې په سر کړ.
اندریا میزا اوسمهال ۲۶ کلنه ده او د دې جایزې په ګټلو ډېره خوښه ده.
د راپورونو له مخې د ښکلا د جایزې (مس یونیورس) پروګرام په امریکا کې ترسره شو، چې اندریا میزا پکې د نړۍ د ۷۰ هېوادونو ښایسته پېغلو ته ماتې ورکړه.
د مس یونیورس سږني پروګرام د پېغلو د ښکلا ترڅنګ سیاسي پېغامونه هم لرل او ځینو پېغلو پکې سیاسي پېغامونه ورکړل.
د میانمار پېغلې له خلکو څخه د خپل هېواد لپاره د دعا غوښتنه کړې، د سنګاپور پېغلې بیا د خپل هېواد بېرغ درلود او له اسیا څخه کرکه مه کوئ پرې لیکل شوي و.
د يادونې ده چې د ښکلا څو بېلا بېلې سیالۍ په نړیواله کچه هر کال ترسره کېږي.