تاند (سه شنبه د ثور ۲۸) د ۲۰۹ شاهین قول اردو په فاریاب ولایت کې د دوه ولسوالانو، څلورو قوماندانانو او درې پاکستاني وګړو په ګډون د ۳۴ وسله والو طالبانو د مرګ ژوبلې خبر ورکړی.
د دغه قول اردو په یوه خبرپانه کې راغلي چې افغان هوايي ځواک د فاریاب پښتون کوټ ولسوالۍ په خواجه ناموسي سیمه کې د طالبانو پر یوه مهمه قرارګاه هوايي برید کړی دی.
سرچینه وايي په دې برید کې ۱۹ وسله وال طالبان وژل شوي، چې د المار لپاره د طالبانو ولسوال زین الله مشهور په خالد، د بالا مرغاب لپاره ولسوال نور الحق، د اندخوی لپاره د نظامي کمېسیون مسؤل ملا اسدالله ترکمن، یو سرګروپ ملا ریحان او درې پاکستاني اتباع هم شامل دي.
خبرپاڼه زیاتوي چې همدې هوايي برید کې د فاریاب لپاره د طالبانو د نظامي مسؤل ملا شعیب په ګډون ۱۵ طالبان ټپیان شوي هم دي.
د ۲۰۹ شاهین قول اردو خبرپانه وايي، په عملیاتو کې د طالبانو ۱۸ وسایط، چې موټر او موټرسایکلونه دي له منځه وړل شوي او دوه شکمن کسان نیول شوي دي.
طالبانو تر اوسه په دې اړه څه نه دي ویلي.