تاند ( سه شنبه ، د ثور ۲۸مه) د امریکا ولسمشر جو بايډن په خپلو تازه څرګندونو کې ویلي، چې د امریکا د خوندي کولو لپاره د نورو هېوادونو خوندي کول اړین دي.
د بایډن په خبره له همدې امله په پام کې لري، چې د نړۍ نورو هېوادونو ته هم د کورونا ضد واکسین ورکړي.
بایډن وایي، چې په راتلونکو شپږو اونیو کې به نورو هېوادونو ته د ۸۰ میلیونه ډوزه واکسینو صادرات پيل شي.
امریکا داسې مهال د دې واکسینو د وېش خبر ورکوي، چې تر دې وړاندې د روغتیا نړیوال سازمان له شتمنو هېوادونو غوښتي وو، چې له اړمنو سره د کورونا واکسین په برخه کې مرسته وکړي.
د روغتیا نړیوال سازمان ویلي وو که شتمن هېوادونه له اړمنو سره مرسته وکړي نو په دې توګه به دغه وبا د نړۍ له مخه ورکه شي.
اوسمهال هند په نړۍ کې یو له هغو هېوادونو دی، چې د کورونا درېیمې څپې سخت تر اغېز لاندې راوستی او ورځ تربلې په کې پيښې ډېرېږي.