تاند (دوشنبه د ثور ۲۷) په لوګر ولایت کې پر یوه کور د هاوان مرمۍ لګېدو له امله درې کسان وژل شوي او شپږ نور ټپیان دي.
ځایي اوسیدونکو ویلي چې تېر ماښام د لوګر برکي برک ولسوالۍ اړوند لغټک سیمه کې د ملکیانو پر یوه کور د هاوان مرمۍ لګېدلې، چې له امله یې د ښځو او ماشومانو په ګډون درې کسان وژل شوي او شپږ نور ټپیان شوي.
د لوګر د امنیه قوماندانۍ ویاند بیا وایي چې د هاوان دا مرمۍ د طالبانو له خوا توغول شوې ده.
طالبانو بیا تر اوسه په دې هکله خپل نظر نه دي څرګند کړی.