تاند ( دوشنبه، د ثور ۲۷ مه) د ولسي جرګې غړي وایي، وسلوالو طالبانو بیا ځلی تاوتریخوالي ته زور ورکړی چې دوی یې اندېښمن کړي دي.
د ولسي جرګې ګڼو غړو د ننۍ غونډې په امتیازي ساعت کې د خبرو پر مهال وویل چې د اختر په ورځو کې بشپړ اوربند نه و تامین او په ځینو سیمو کې امنیتي پېښو ملکي وګړو ته مرګ ژوبله اړولې ده.
وکیلان وایي چې د طالبانو له لوري د تاوتریخوالي ډېرول د سولې خبرې له خنډ او ځنډ سره مخ کولی شي.
د دغې جرګې رییس میر رحمان رحماني وایي چې طالبان باید تاوتریخوالی کم کړي او اوربند ته دې ادامه ورکړي.
دده په خبره د تاوتریخوالي د ډېرېدو په صورت کې طالبان د سولې خبرې له ځنډ او خنډ سره مخ کوي چې د بیګناه افغانانو د وژل کېدو سبب ګرځي.
د ولسي جرګې ځینو غړو دغه راز پر حکومت هم نېوکې وکړې چې ګواکې د سولې لپاره اړین اقدامات او هڅې نه ترسره کېږي او دې هر څه د خلکو ژوند ته خطرونه جوړ کړي دي.
دا په داسې حال کې ده چې د طالبانو له لوري د اختر په مناسبت تر درې ورځني اوربند وروسته یو ځل بیا طالبانو د افغان ځواکونو پر وړاندې بریدونه ډېر کړي او په ترڅ کې یې دواړو غاړږ ته د مرګ ژوبلو راپورونه ورکول کیږي.
ورته مهال ځینو بهرنیو رسنیو خبر ورکړی چې وسلوالو طالبانو د ترکیې ناسته کې د ګډون په موخه نوی شرط وړاندې کړی دی.
د راپورونو په حواله، طالبانو ویلي چې د افغانستان په اړه ناسته کې ګډون کوي؛ خو وایي دا غونډه دې هم په قطر کې ترسره شي.
د طالبانو له لوري د دې شرط په اړه تر اوسه افغان حکومت او یا هم په دغه غونډه کې د نورو هېوادونو ګډون کوونکو استازو څه نه دي ویلي.