تاند (دوشنبه د ثور ۲۷) قطر وايي، له افغانستان سره په اقتصادي، سوداګریزه او سیاسي برخه کې د اړیکو د پراختیا په لټه کې دي او هڅه کوي په افغانستان کې د پانګونې له لارې له افغانانو سره د ودې او پرمختګ په برخه کې همکاري وکړي.
دغه خبره په کابل کې د قطر سفیر سعد بن مبارک د افغانستان د بهرنیو چارو له وزیر محمد حنیف اتمر سره د لیدنې پر مهال کړې.
د بهرنیو چارو وزارت له لوري په یوه بیان کې راغلي، په دې لیدنه کې ښاغلي مبارک وویل چې د افغانستان او قطر ترمنځ د اړیکو پراختیا د دواړو هېوادونو په ګټه ده، نو باید پراختیا ومومي.
د بیان له مخې ښاغلي اتمر قطر د افغانستان ښه ملګری هېواد هېواد وباله او زیاته یې کړه چې د سولې په برخه کې ددغه هېواد مرستې خورا مهمې دي.
د بهرنیو چارو وزارت وايي چې دواړو لوریو ټینګار وکړ چې د اړیکو د لا پراختیا لپاره به نوې هوکړې رامنځ ته کوي.