تاند- د روسیې ګامالیا تحقیقاتي مرکز وايي، د کورونا وایرس پر ضد د یوه نوي واکسین پر کلینیکي ازمېښت بوخت دی چې بوی کېږي.
د تاس خبري اژانس د راپور له مخې، د روسیې د ګامالیا د مایکروبیالوجي او اپیدومالوجي د څېړنیز مرکز رييس الکساندر ګینزبرګ وايي، که د دغه واکسین کلینیکي ازموینه بریالۍ شوه، نو تر راتلونکي کال پورې به ثبت شي.
ګینزبرګ وايي، ګامالیا څېړنیز مرکز د کووید نولس واکسینونو د انکشاف لپاره په څو برخو کې په کار بوخت دی چې یو یې استنشاق کېدونکی واکسین دی.
ده زیاته کړه«موږ یو لړ تجربې کړي او اراده لرو چې د روان میلادي کال په وروستیو کې یا د ۲۰۲۲ په لومړیو کې دا ډول واکسین بشپړ کړو.»
حاضردمه د نړۍ تر ټولو بریالی واکسین د امریکا او جرمني ګډ محصول فایزر او بیوانډ ټیک دی چې دوه ډوزه ورکول کېږي.
روسیې، چین، بریتانیا او ځینو نورو هیوادونو هم د کورونا وایرس پر ضد واکسینونه جوړ کړي دي.
د روسیې د نورو واکسینونو د نتیجې په اړه کره معلومات نه دي خپاره شوي.