تاند (پنجشنبه د ثور ۲۳) افغان ولسمشر محمد اشرف غني د ایران له ولسمشر حسن روحاني سره ټلیفوني خبرې وکړې.
ارګ چهارشنبه/ د ثور ۲۲/ ماښام ناوخته په بیان کې ویلي چې په دغه خبرو کې حسن روحاني په افغانستان کې د وروستیو پېښو په هکله د ایران د حکومت او خلکو په استازیتوب خواخوږي څرګنده کړه.
همداراز دواړو لوریو د افغان سولې پروسې، سیمه ییزې همکارۍ او د افغانستان او ایران د اړیکو پر پراختیا هم خبرې وکړې.
په دې وروستیو کې له بل هر وخت په افغانستان کې د تاوتریخوالی کچه زیاته شوې چې ورسره هممهال د افغان، ایراني او پاکستاني چارواکو خبرې او لیده کاته ډېر شوي دي.
وروستۍ دوه پېښې چې په لوګر او د کابل په دشت برچي کې وشوې ګڼ شمېر ملکیانو ته په کې مرګ ژوبله واوښته. دغو پېښو د ټولو افغانانو غوصه راپارولې ده.
له حسن روحاني سره تر خبرو مخکې د سې شنبې په ورځ/ د ثور ۲۱/ ولسمشر غني د افغانستان په چارو کې د ایران د بهرنیو چارو وزارت له ځانګړي استازي ابراهیم طاهریان سره وکتل.
د ارګ د معلوماتو له مخې، دواړو لوریو د دوه اړخیزو اړیکو، په سولې پروسه کې د وروستیو پرمختګونو او سیمه ییزو مسایلو په هکله بحث او خبرې وکړې.
تر دې یوه ورځ مخکې د پاکستان لوی درستیز د خپل هیواد د استخباراتي ادارې (آی ایس آی) د رئیس ډګرجنرال فیض حمید او د بریتانیا د پوځ لوی درستیز نیکلاس کارټر هم په ګډه کابل ته سفر وکړ او له ولسمشر غني سره یې وکتل.
دا کتنې داسې مهال کېږي چې طالبانو د کوچني اختر په مناسبت په افغانستان کې د درې ورځني اوربند اعلان کړی، خو افغان چارواکي او خلک وايي چې افغان وژنه په هر وخت کې ناروا ده نو طالبان باید روان وضعیت ته د پای ټکی کېږدي، د خبرو مېز ته حاضر شي او د خپلو افغانانو له وینې تویولو د تل لپاره لاس واخلي.