تاند (چهارشنبه د ثور ۲۲) د افغانستان د بهرنیو چارو وزارت پر فلسطینیانو د اسراییلو وروستي بریدونه وغندل.
د بهرنیو چارو وزارت له لوري په خپره شوې اعلامیه کې راغلي چې د اسراییلو دغه غیر مسؤلانه کړنه په ټوله نړۍ کې سوله او ثبات له ګواښ سره مخ کولی شي.
د اعلامیې له مخې، اسراییلي عسکرو د ټولو نړیوالو قوانینو پر خلاف پر مسلمانانو په الاقصی جومات کې، چې د مسلمانانو لومړنۍ قبله ده، برید کړی دی.
د افغانستان حکومت له نړیوالو غوښتي چې د اسراییلو پر نارواوو دې سترګې نه پټوي.
د راپورونو له مخې حماس ډلې په بې مخینې توګه د اسراییلو پر مرکز ۱۳۰ توغندي توغولي دي چې درې اسراییلیان پکې وژل شوي.
بلخوا اسراییلو بیا خپل هوایي بریدونه د غزې پر نظامي هدفونو ډېر کړي دي. په وروستي اقدام کې یې د حماس ډلې د مشرانو پر یوه ۱۳ پوړیزه ودانۍ هوایي برید کړی او نړولې یې ده.
په غزه کې د یوه روغتون مسؤلینو ویلي چې په وروستیو نښتو کې تر دې دمه ۲۸ فلسطینیان وژل شوي دي.
د اسراییلو او فلسطین ترمنځ نښتې وروسته له هغه ډېرې شوې چې اسراییلي عسکرو په بیت المقدس کې پر فلسطینیانو برید وکړ او ګڼ کسان یې ټپیان کړل.