تاند(دوشنبه، د ثور۲۰) لیکوال او دیپلومات هارون حکیمي د اطلاعاتو او فرهنګ وزارت د کلتور او هنر د معین په توګه د دې وزارت کارکوونکو ته معرفي شو.
په دې مناسبت غونډې ته د اطلاعاتو او کلتور سرپرست وزیر محمدطاهر زهیر وویل، حکیمي یو متحرک، فعال او مستعد ځوان دی او هیله لري چې د اطلاعاتو او کلتور وزارت ته د نوموړي راتګ به د کلتور او هنر له ودې سره مرسته وکړي.
د اطلاعاتو او کلتور وزارت پخواني مرستیال او سرپرست پوهاند رسول باوري هم کلتور ا و هنر ته پاملرنه ضروري وبلله او هیله یې وښوده چې د ښاغلي حکیمي له ټاکل کېدو سره به په دې برخه کې لوړ ګامونه واخیستل شي.
ښاغلی حکیمي لیکوال او شاعر دی او مخکې تر دې چې په امریکا کې د افغانستان په سفارت کې د دیپلومات په توګه کار پیل کړي یوه موده د اطلاعاتو او کلتور وزارت ویندوی و.
په همدې حال کې د پوهنې وزارت پخوانی مرستیال محمداصف ننګ د سرحدونو او قبایلو د چارو د مرستیال وزیر په توګه وټاکل شو.
ښاغلي ننګ د فراه او لغمان د والي په توګه هم دندې ترسره کړي دي.