تاند ( دوشنبه، د ثور ۲۰مه) د ختیځ لغمان، کونړ، نورستان او ننګرهار ولایتونو ځوانانو په جلال اباد ښار کې د یوې غونډې پرمهال وروستۍ نا امني د اندېښنې وړ وبلله او له وسله والو طالبانو يې وغوښتل، چې د کوچني اختر په مناسبت دې کړی درې ورځنی اوربند وغځوي.
دوی وایي، د جګړې دوام د دواړو اړخونو په زیان دی او له ښکېلو لوریو یې وغوښتل څو تلپاتې اور بند وکړي.
دوی د افغان سولې په اړه د ترکیې ناسته هم برخلیک ټاکونکې بولي او له افغان حکومت او وسله والو طالبانو غواړي څو پر یو بل بریدونو ته د پای ټکی کېږدي.
په دې غونډه کې ښځینه فعالانو هم برخه درلوده.
ښځینه فعاله فاطمه صبا د جګړې پر ښکېلو خواوو غږ کوي، چې د جګړې پرمهال دې د ملکي وګړو کورونه د سنګر په توګه نه کاروي.
د ختيځو ولایتونو ځوانان داسې مهال پر تلپاتې اوربند ټینګار کوي، چې تازه وسله والو طالبانو د اختر درې ورځې اوربند اعلان کړی دی.
د وسله والو طالبانو له لوري شوی درې ورځنی اوربند د هرکلي ترڅنګ له نیوکوسره هم مخ دی.
افغان ولس او چارواکي وایي، د جګړې فصل په درې ورځني اوربند نه بلکې په تلپاتې اوربند بندېدلی شي.
ولسمشرۍ ماڼۍ وایي، د طالبانو له لوري د اختر په درېیوو ورځو کې له اعلان شوي اوربنده خبر دي، خو زیاتوي چې د دوی او افغان ولس ټینګار پر دایمي او واقعي اوربند دی.
د ارګ له لوري په خپره شوې خبرپاڼه کې راغلي، تاوتریخوالی، د ملکي وګړو قتل او وژنه، د زیربناوو او عامه ځایونو ویجاړول نه یواځې د اختر، بلکې په نورو ورځو کې هم شرعي جواز نه لري.
په ورته مهال د ټولنیزې مېډيا افغان کاروونکي بیا وایي، د طالبانو له لوري درې ورځنی اوربند د خلکو د خوشالولو لپاره یو غوره ګام دی،خو په وینا یې د روانې جګړې د حل یوازینۍ لار خبرې اترې او دایمي اوربند دی.