تاند(شنبه، د ثور۱۸) د پلازمېنې کابل د مکروریانو په شاهین مارکیټ کې نن ماسپښین پراخ اور لګېدلی دی.
تر دې دمه د اور لګېدو علت نه دی څرګند خو د اور لمبې ډېر ژر لسګونو دوکانونو ته خپرې شوي دي.
د دغه مارکیټ په شاوخوا کې هم ګڼ دوکانونه شته چې ډېرې یې د کور د وسایلو دي.
د اور لمبې یوه خصوصي ښوونځي ته هم غځېدلي دي.
په عکسونو کې د جهان عالي لېسه لیدل کېږي چې د اور لمبې ورخپرې شوې دي.
په ښار کې د موټرو بیروبار د دې سبب کېږي چې اطفاییه په وخت د پېښې ځای ته ونه شي رسېدای.
په کابل او د افغانستان په نورو ښارونو کې دا ډول پېښې زیاتې شوې دي او عموماً دا ډول پېښې د بې پروایۍ له کبله رامنځته کېږي.
تېره اوونۍ د کابل په شمال کې (په ۱۷ ناحیه کې) د شکردرې په کاریزمیر کې د تېلو په یوه ټانک کې د اورلګېدو په نتیجه کې لږترلږه ۹ تنه ووژل شول او۱۴ نور سخت ژوبل شول.