تاند(چهارشنبه، د ثور۱۶) د امریکا پوځ نن قطر ته شپږ بي -۵۲ الوتکې ولېږلې چې له افغانستانه د امریکايي او ناټو ځواکونو د وتلو ساتنه وکړي.
دا الوتکې د قطر په العدین هوايي اډه کې ځای پر ځای شوې.
په قطر کې، چې د طالبانو د سیاسي دفتر کوربه دی، د سیمې لپاره د امریکايي پوځیانو تر ټولو ستره اډه هم شته.
بي ایم ۵۲ هغه الوتکې دي چې په ۲۰۰۱ کال کې یې د طالبانو د رژیم په پرزولو کې مهم رول ولوباوه خو وروسته له دې چې امریکايي پوځیان په افغانستان کې مېشت شوي، د افغانستان په جګړه کې ورڅخه کار نه دی اخیستل شوی.
د امریکايي رسنیو د راپور له مخې، دا شپږ الوتکې د اپریل په ۲۳ او ۲۶ له شمالي ډاکوټا څخه قطر ته والوتې.
وروستۍ دوې د مې په ۴ مه قطر ته ورسېدې.
د امریکايي رسنیو د راپور له مخې، دا بي ۵۲ الوتکې د امریکا د دفاع وزیر لوید اسټن په موافقه قطر ته ولېږل شوې.
امریکايي چارواکي وايي، که څه هم طالبانو تراوسه پورې د دوی پر ځواکونو او اډو کوم برید نه دی کړی خو دا الوتکې یې د احتیاطي تدابیرو لپاره استولي دي.
امریکايي چارواکو طالبانو ته خبرداری ورکړی چې که د دوی د ځواکونو خلاف یې هر راز خوځښت وکړ نو سخت به وځپل شي.
په همدې حال کې طالبانو په څو ولایتونو کې د افغان امنیتي ځواکونو پر ضد پراخ بریدونه پیل کړي دي.
راپورونه وايي چې دې ډلې په هلمند کې د خپلو بریدونو په پیل کې یو څه پرمختګ وکړ خو ژر بېرته سخت وځپل شول.
له بلې خوا طالبان په بغلان ولایت کې وتوانېدل چې د بورکې ولسوالي ونیسي. بورکه، که څه هم د کومې مهمې لارې په سر کې نه ده، خو د بغلان هغه ولسوالي ده چې له تخار او کندوز سره پوله لري.