تاند ( چهارشنبه، د ثور ۱۵مه) په هندکې اوس هم د کورونا درېيمه څپه په تېزۍ د خپرېدو په حال کې ده.
تازه د هندي رسنیو د راپورونو له مخې په تېرو ۲۴ ساعتونو کې په دغه هېواد کې پر کورونا ویروس اخته ۳۷۸۰ کسان مړه شوي دي.
سرچینو د هند د روغتیايي چارواکو له قوله ویلي، چې په یاده موده کې د کورونا ویروس ۳۸۰ زره مثبتې پېښې هم ثبت شوې دي.
له دې پېښو سره په هند کې پر کورونا د اخته کسانو شمېر تر ۲۰ میلیونه اوښتی دی.
په هند کې د کورونا ناروغۍ د تازه څپې له خپرېدو سره په دغه هېواد کې د کورونا ویروس له امله ورځ تر بلې د مړو او ناروغانو شمېر زیاتېږي.
په یاد هېواد کې دکورونا تازه څپې د خلکو تر څنګ د هند حکومت هم له سختو ستونزو سره مخ کړی دی.
د یادونې ده، چې په هند کې د کورونا ویروس د خپرېدو له وېرې د یاد هېواد سوداګریز لیګ آی پي اېل هم تر نامعلومې نېټې ځنډېدلی دی.
د هند سربېره د کورونا درېیمې څپې په ایران او پاکستان کې هم اندېښنې را ولاړې کړې دي.
د معلوماتو له مخې په دې وروستیو کې په ایران او پاکستان کې هم د کورونا ناروغۍ مثبتې پېښې ډېرې شوې دي.