تاند(چهارشنبه، د ثور ۱۵) تخار کې یوې مور خپل ځان او درې اولادونه سیند ته غورځولي.
د یادې کورنۍ یو تن خپلوان وایي، چې پېښه د کورني تاوتریخوالي له کبله رامنځ ته شوې ده.
د نوموړي په خبره دغه پېښه د فرخار لُجده قریه کې له هغې وروسته رامنځ ته شوې، چې د یادې مېرمنې خاوند په کور کې د دویم واده خبره راپورته کړې وه.
د سرچینې د مالوماتو له مخې “د مړې شوې مېرمن خاوند عبدالله نومیږي او څو ورځې وړاندې یې په خپل کور کې د دویم واده خبره کړې وه، چې وروسته په کورني تاوتریخوالي بدله او په پایله کې یې مېرمن ځان له خپلو درې واړو اولادونو سره یو ځای د کور مخکې روانو اوبو ته غورځولی او خپل ژوند یې له لاسه ورکړی.”
سرچینې زیاته کړې، چې د دغې مېرمنې څلور اولادونه وه، چې درې یې سیند ته غورځولي؛ خو یو درې میاشتینی ماشوم یې په کور کې پریښی دی.
بلخوا تېره ورځ د دغې سیمې ځایي اوسېدونکو د پېښې لامل د یادې کورنۍ غربت او بې وزلي یادوي.
په ورته وخت کې د تخار پولیسو هم پېښه تایید کړې؛ خو د لامل په اړه یې د پلټنو خبره کوي.
د یادونې ده، چې په افغانستان کې هر کال د کورني تاوتریخوالي له امله ډېری مېرمنې خپل ژوند له لاسه ورکوي.
له اوږدې مودې راهیسې افغان حکومت د مېرمنو پر وړاندې خشونت او کورني تاوتریخوالي ګراف د کمولو لپاره هڅې کوي؛ خو بیا هم په یو شمېر سیمو کې دې ته ورته پېښې رامنځته کېږي.
د بشر حقونو خپلواک کمیسیون هم د کورني تاوتریخوالي له امله د مېرمنو ستونزې مني؛ خو زیاتوي، چې دوی په دغه برخه ډېر فعالیتونه ترسره کړې ترڅو ښځې له خپلو حقونو برخمنې شي؛ خو لا هم د ورته پیښو د رامنځته کېدو یادونه کوي.