تاند (شنبه د ثور ۱۱) د افغانستان حکومت د ترویکا په چوکاټ کې د امریکا، روسیې، چین او پاکستان غونډې له وروستي دريځ هرکلی وکړ.
د بهرنیو چارو وزارت نن شنبه په یوه بیان کې ویلي چې دغو هېوادونو ټینګار کړی چې طالبان باید تاوتریخوالی کم کړي او دایمي اوربند ته لار هواره کړي.
په بیان کې راغلي چې د تاوتریخوالي کمېدل، د جګړو له منځه تلل، دایمي اوربند، د تېرو لاس ته راوړنو ساتل د افغانانو ستره هیله ده غواړي.
بیان زیاتوي، افغانان غواړي چې ژر تر ژره یې په هېواد کې روانې خونړۍ جګړې پای ته ورسېږي او په دې برخه کې د نړیوالو له ملاتړ او هڅو مننه کوي.
بهرنیو چارو وزارت یو ځل بیا پر طالبانو غږ کړی چې هدفي بریدونه پای ته ورسوي، تاوتریخوالی کم کړي او د مذاکراتو پر مېز د سیاسي حل پر مټ افغان جګړه ختمه کړي.
د ترویکا پلس غونډه چې پرون په دوحه کې پیل شوې ده، ګډونوالو یې ویلي چې د ملګرو ملتونو له تور لیست څخه د طالب مشرانو نومونه په دې شرط لرې کوي چې دغه ډله تاوتریخوالی کم کړي او د افغان کشالې سوله ییز حل ته غاړه کېږدي.
د دې غونډې ګډونوالو هېوادونو دغه راز د افغانستان حکومت او طالبان دواړه د سولې په خبرو کې پرمختګ ته هڅولي دي.