تاند (پنجشنبه د ثور ۸) امریکا وایي د قطر په العدید هوايي اډه کې یې لا ډېرې الوتکې ځای پر ځای کړې دي.
د امریکایي پوځ مرکزي قومندانۍ په یوه بیان کې ویلي چې د العدید په هوايي اډه کې یې دوه نورې بي ۵۲ بم غورځوونکي الوتکې ځای پر ځای کړې چې د اړتیا په صورت کې به په افغانستان کې عملیات ترسره کوي.
امریکايي چارواکو ویلي، دغه الوتکې په دې موخه د العدید په هوايي اډه کې ځای پر ځای کېږي چې له افغانستان د سرتېرو د ایستلو پروسه په ډاډمنه فضا کې بشپړه شي.
امریکايي چارواکو زیاته کړې چې د دغو الوتکو او نورو اړینو اقداماتو په ترسره کولو به د هر ډول احتمالي خطر مخنیوی کېږي.
د یادونې ده چې امریکا تر دې مخکې هم دوه نورې بي ۵۲ الوتکې په یاده اډه کې ځای پر ځای کړې وې او ویلي یې و چې دغه الوتکې به له افغانستان د بهرنیو ځواکونو د وتلو د بهیر ساتنه کوي.
امریکا ویلي چې ټولټال به شپږ الوتکې د لنډې مودې لپاره په یاده هوایي اډه کې ځای پر ځای کړي.