تاند (سه شنبه، د ثور ۷مه) ځايي سرچینې وايي تېره شپه د وردګ بابا ټرانسپورټي شرکت اړوند ۵۸۰ او ۴۰۴ ډوله مسافر وړونکو موټرو ټکر کړی چې له امله يې ۷۷ تنو ته مرګ ژوبله اوښتې ده.
سرچینه زیاتوي، چې ټکر د کابل پغمان ولسوالۍ اړوند ارغندۍ سیمه کې شوی دی.
سرچینه وایي په دې پېښه کې ۱۱ تنه مړه شوي دي.
خو بل لورته بیا د کورنیو چارو وزارت ویاند طارق ارین وایي، چې په دې پېښه کې ۷ تنه مړه شوي او ۷۰ تنه نور ژوبل دي.
ډېری وخت حکومتي چارواکي پر دې لاره د ترافیکي پېښو لامل د موټرچلوونکو بې احتیاطي یادوي.
خو موټر چلوونکي بیا د لارې خرابوالي لویه ستونزه یادوي.
د یادونې ده، چې تېره جمعه د غویې په ۳ مه نېته هم په زابل ولایت کې ترافیکې پېښې ۲۶ مسافرو ته مرګ ژوبله اړولې وه.
په یاده پېښه کې وژل ۱۴ مسافر د ننګرهار د پچير آګام ولسوالۍ اوسېدونکي وو چې هلمند ته د مزدورۍ لپاره تللي وو او بېرته خپلو کورونو ته راستنېدل.