تاند (یکشنبه د ثور ۵) د افغانستان لپاره د پاکستان ځانګړی استازی محمد صادق د یوه لوړپوړي پلاوي په ملتیا د سولې، امنیت او نورو اړوند مسایلو پر سر له افغان چارواکو سره د خبرو لپاره کابل ته راغلی.
په کابل کې د پاکستان سفیر منصور احمد خان نن یکشنبه/د ثور ۵/ پر خپل ټویټر لیکلي چې دغه پاکستانی پلاوی نن کابل ته راغلی دی او د افغانستان د بهرنیو چارو سرپرست وزیر سره یې په لیدنه کې د سولې د بهیر او دوه اړخیزو اړیکو په هکله رغوونکې خبرې اترې وکړې.
Pakistan’s SRep on Afghan Reconciliation Ambassador Sadiq called on Afghan Acting FM Nab along with Pakistan delegation. Had constructive discussions on peace process and bilateral engagement @AmbassadorSadiq @PakistaninAfg pic.twitter.com/SRNjYk5WJ7
— Mansoor Ahmad Khan (@ambmansoorkhan) April 25, 2021
د افغانستان د ملي امنیت شورا سلاکار حمدالله محب هم تیره ورځ کابل ته د پاکستاني پلاوي د راتګ خبر ورکړی و او ویلی یې و چې له دغه پلاوي سره د دوه اړخیزو اړیکو د پیاوړتیا، د افغانستان او پاکستان ترمنځ د ستونزو په حل او تخنیکي مسایلو بحثونه کېږي.
ټاکل شوې وه چې څو ورځې مخکې د پاکستان د پارلمان مشر اسد قیصر په مشرۍ یو پلاوی کابل ته په درې ورځني سفر راشي، خو د کابل په هوايي ډګر کې د امنیتي ستونزو له امله د یاد پاکستاني پلاوي الوتکې ته د ناستې اجازه ورنه کړل شوه.
افغان چارواکو ویلي ځکه یې په کابل هوايي ډګر کې د یاد پاکستاني پلاوي الوتکې ته ښکته کېدو ته اجازه ورنه کړه چې په ډګر کې پخواني چاودېدونکي توکي موندل شوي و او دوی هڅه کوله چې شنډ یې کړي.
صادق خان په داسې مهال له افغان چارواکو سره د خبرو لپاره کابل ته راغلی چې ولسمشر غني څو ورځې مخکې پاکستان ته په خطاب کې ویلي و چې د دوستۍ او دښمنۍ انتخاب دې وکړي.
د ښاغلي غني په خبره، که افغانستان نا ارامه وي پاکستان به هم نا ارامه وي او په وینا یې که پاکستان د افغانستان هوساینه او سوکالي غواړي دغه هېواد به هم هوسا او سوکاله وي.
بله خوا کابل ته د پاکستاني پلاوي له سفر څخه څو ورځې مخکې طالبانو د استانبول ناسته کې چې ټاکل شوې وه د اپریل په ۲۴مه د ترکیې په کوربتوب جوړه شي، له ګډون انکار وکړ.
په پام کې وه چې په دې ناسته کې د افغان سولې په تړاو خبرې شوې وی، خو طالبانو وویل، تر هغو چې بهرني ځواکونه له افغانستانه نه وي وتلي، دوی د سولې خبرې نه کوي.
خو د امریکا ولسمشر جو بایډن اعلان کړی چې د روان کال د سپټمبر تر ۱۱ مې به له افغانستانه خپل ځواکونه وباسي.