تاند (یکشنبه د ثور ۵) طالبانو د ملکي خلکو د مرګ ژوبلې په هکله د افغانستان د کورنیو چارو وزارت راپور بې اساسه وباله.
د کورنیو چارو وزارت نن یکشنبه/ د ثور ۵/ په یوه خبرپاڼه کې ویلي چې طالبانو د روان کال د حمل میاشتې له ۲۵مې نیټې څخه د ثور میاشتې تر ۵مې نیټې پورې، د لسو ورځو په جریان کې د ځانمرګو بریدونو او ماین چاودنو پایله کې ۶۳ ملکیان وژلي او ۱۸۰ نور یې ټپيان کړي دي.
خو د طالبانو د نظامي چارو ویاند ذبیح الله مجاهد بیا د کورنیو چارو وزارت دا راپور بې اساسه بللی او د ملکي تلفاتو پړه پر افغان حکومت اچولې ده.
نوموړي پر خپل ټویټر لیکلي چې د دوی له خوا په ملکي خلکو کوم برید نه دی شوی.
د کورنیو چارو وزارت په اعلامیه کې راغلي چې طالبانو په خپلو وروستیو تحرکاتو کې ۶۳ ملکي وګړي وژلي او ۱۸۰ نور یې ټپیان کړي دي.
د خبرپاڼې له مخې، چې په یاده موده کې د افغان ځواکونو په عملیاتو کې بیا د یو شمېر طالب قومندانانو په ګډون ګڼ شمېر وسله وال طالبان هم وژل شوي دي.
بله خوا یوناما په خپل وروستي راپور کې ویلي چې د روان ۲۰۲۱ز کال په لومړیو ۳ میاشتو کې ۵۷۳ ملکي وګړي وژل شوي او تر ۱۲۰۰ ډېر نور ټپيان شوي دي.
په راپور کې راغلي، چې سږ کال د تېر کال همدې مودې په پرتله د مرګ ژوبلې کچه ۲۹ سلنه ډېروالی ښیي.
د یوناما په راپور کې د ملکي مرګ ژوبلې د ۶۱ سلنې مسؤلیت په طالبانو او نورو دولت ضد وسله والو ډلو اچول شوی او د ۲۷ سلنې مرګ ژوبلې مسؤل یې بیا افغان دولت بلل شوی دی.