تاند (یکشنبه د ثور ۵) د میدان وردګ ولایت سیدا اباد ولسوالۍ کې د هاوان مرمۍ د لګېدو په پېښه کې د یوې کورنۍ څلور غړي وژل شوي او پنځه نور ټپیان شوي دي.
د دې ولسوالۍ اوسېدونکي وایي چې دغه پېښه پرون ماښام مهال د روژه ماتي پر وخت د سید اباد ولسوالۍ اړوند اوتړیو سیمه کې شوې ده.
دوی وایي چې په وژل شویو او ټپيانو کې ښځې او ماشومان هم شامل دي.
د راپورونو له مخې، له دې پېښې وروسته ځایي خلکو د اعتراض په ډول د وژل شویو کسانو جنازې د کابل ـ کندهار لویې لارې ته راوړې او د عدالت غوښتنه کوي.
تر اوسه امنیتي سرچینو یا د دولت کومې مخالفې ډلې په دې هکله خپل نظر نه دی څرګند کړی.