تاند ( یک شنبه، د ثور ۵مه) هندي رسنۍ وایي، چې په دې هېواد کې په تېرو ۲۴ ساعتونو کې د کورونا وبا له امله ۲ زره ۷ سوه ۶۷ کسان مړه شوي دي.
د هندي رسنیو د راپورنو له مخې دغه راز په تېرو ۲۴ ساعتونو کې ۳۱۷ زره ۱۱۳ کسان تازه په دغه ناروغۍ اخته شوي هم دي.
سرچینې وایي، چې د کورونا تازه څپه په هند کې په چټکۍ د خپرېدو په حال کې ده او عام خلک یې سخت اندېښمن کړي دي.
وړمه ورځ هم هندي رسنیو ویلي وو، چې په دې هېواد کې په ۲۴ ساعتونو کې ۳۵۰ زره ډېرې مثبتې پېښې ثبت شوي.
دد رسنیو د معلوماتو له مخې د پېښو د زیاتوالي له امله په هند کې ډيری روغتونونه د توکو او اکسیجن له کمښت سره مخ دي.
رسنۍ وایي: « روغتونونو کې ځای نشته، اکسیجن ناروغانو ته نه رسیږي او د مړو سوځولو چارو ته رسیدګي سخته شوې ده.»