تاند (پنجشنبه د ثور ۲) بریتانیا وايي، ښایي طالبان د مۍ میاشتې له لومړۍ نیټې وروسته د بهرنیانو پر وړاندې خپل بریدونه له سره پیل کړي.
دغه خبره په کابل کې د بریتانیا سفارت نن پنجشنبه/د ثور ۲/ په یوه خبرپاڼه کې کړې او خپلو اتباعو ته یې خبرداری ورکړی دی چې د امنیتي ملحوظاتو له امله دې هر څه ژر له افغانستان څخه ووځي.
We are now advising against all travel to the whole of #Afghanistan, for security reasons. British nationals in Afghanistan are advised to consider leaving by commercial means as soon as possible. More info: https://t.co/mwKv3BogiS
— UK in Afghanistan (@UKinAfghanistan) April 22, 2021
په خبرپاڼه کې له بریتانوي اتباعو غوښتنه شوې ده چې د افغانستان ټولو ولایتونو ته دې له سفر څخه ډډه وکړي.
بریتانیا وروسته له هغه خپلو اتباعو ته دا خبرداری ورکړی چې طالبانو د امریکا د ولسمشر جو بایډن له لوري تر سپټمبر میاشتې پورې د سرتېرو د وتلو غبرګون کې ویلي چې امریکا د دوحې هوکړه نقض کړې او د بدو عواقبو پړه به یې هم د همدوی په غاړه وي.
خو جو بایډن له افغانستان څخه د امریکایي ځواکونو د اېستلو د نیټې تر اعلانولو وروسته د طالبانو ډلې ته خبرداری ورکړ چې په دغه موده کې پر ځواکونو باندې د برید په فکر کې ونه اوسي او که داسې وکړي د جدي غبرګون سره به مخامخ شي.
نوموړي ویلي و، “طالبان باید پوه شي کله چې مونږ وځو، که پر مونږ برید وکړي د خپل ځان او خپلو شریکانو څخه به په ټولو هغو وسایلو چې لرو یې دفاع وکړو.”
د ولسمشر بایډن د پریکړې له مخې، د د امریکايي ځواکونو د وتلو بهیر به د مۍ په لومړۍ نیټه پیل او د سپتمبر تر ۱۱پورې به بشپړ شي؛ هغه پرېکړه چې طالبانو د دوحې تړون څخه سرغړونه ګڼلې ده.