تاند (پنجشنبه د ثور ۱) چارواکي وايي، د ملي امنیت ځواکونو په ننګرهار ولایت کې هغه ځانمرګی بریدګر نیولی چې په یوه جومات کې یې د برید کولو پلان درلود.
د ننګرهار مطبوعاتي دفتر نن چهارشنبه په یوه خبرپاڼه کې ویلي چې د ملي امنیت ځواکونو په دې ولایت کې د یوې اوونۍ په ترڅ کې اووه تنه د بېلا بېلو جرمونو په تړاو د وسلو او مهماتو سره یو ځای نیولي دي.
په خبرپاڼه کې راغلي، په نیول شویو کسانو کې یو ځانمرګی بریدګر هم شامل دی چې په شینوارو ولسوالۍ کې یې په یوه جومات کې د برید پلان درلود، خو هدف ته له رسېدو مخکې د جلال اباد ښار اوومې ناحیې په مربوطاتو کې ونیول شو.
د خبرپاڼې له مخې د احمد په نوم دا کس د کوزې پښتونخوا اصلي اوسیدونکی دی چې د لواړګي په مدرسه کې روزل شوی و.
د چارواکو په وینا د ځانمرګي سربېره په یادو کسانو کې یو فرېبکار یو داعش او څلور وسله وال طالبان دي چې په خپلو جرمونو یې اعتراف کړی دی.