تاند ( سه شنبه، د حمل ۳۱) ملي دفاع وزارت وایي، چې افغان ځواکونو په هلمند کې د طالبانو یو زندان مات کړی دی.
یاد وزارت په یوه خبرپاڼه کې ویلي، چې سرتېرو یې تېره شپه د هلمند په موسی کلا ولسوالۍ کې عملیات ترسره کړي دي.
سرچینه زیاتوي په دې عملیاتو کې په یاده ولسوالۍ کې د طالبانو یو زندان مات شوی چې شاوخوا اته ویشت زندانیان ترې خوشې کړای شول.
دفاع وزارت زیاتوي چې خوشې شوي کسان ټول ملکي وګړي دي.
سرچینې دغه راز ویلي چې افغان ځواکونو په دې عملیاتو کې شپږ طالب وسله وال هم وژلي دي.
بل لورته بیا طالبانو تر اوسه په دې اړه غبرګون نه دی ښودلی.