تاند ( سې شنبه، د ثور ۱) د افغانستان د کرنې اوبو لګولو او مالداري وزارت مسوولین په هېواد کې د غوا او وریو د غوښې د کلني تولید د ډېروالي خبر ورکوي.
د دغه وزارت څخه په خپره شوې خبرپاڼه کې راغلي چې د احصایې او معلوماتو ریاست له خوا راټول شوې شمېرې ښيي چې په ۱۳۹۹یم کال کې د هېواد په کچه د وري، وزې او غواوو یومیلیون او ۵۸۹ زره او ۲۶۹ مټریک ټنه غوښه تولید او مصرف شوې ده.
خبرپاڼه وایي، د شمېرو له مخې د تولید شوو غوښو له ډلې ۹۱۲ زره او ۳۸۷ مټریک ټنه یې د غوا غوښه او ۶۷۶ زره او ۸۸۲ مټریک ټنه نور یې د وزې او وریو غوښې دي.
کابل د غوښې د تولیدوونکو او مصروفوونکو ولایتونو د نوم لړ په سر کې ځای لري.
دغه راز تر کابل وروسته، بلخ، ننګرهار، هرات او کندهار هم د غوښو عمده تولیدوونکي او مصرفوونکي ولایتونه بلل شوې دي.
د کرنې اوبو لګولو او مالداري وزارت د معلوماتو له مخې، اوسمهال د هېواد په کچه د غوښینو غواوو، وریو او وزو دوه زره او ۹۵۰ فارمونه شته چې له دې ډلې یوزرو ۶۲ یې د غوښینو غواوو فارمونه، ۹۳۲ یې د وریو د پالنې فارمونه او ۹۵۶ یې د وزو د پالنې فارمونه دي.
دا مهال د هېواد په کورنیو بازارونو کې د غوا او وریو یوکیلو غوښه له ۳۰۰ تر ۵۰۰ افغانیو پورې ده.
په خبرپاڼه کې ویل شوي، د کرنې وزارت د غوښې د تولید د معیاري کولو په پار په یوشمېر ولایتونو کې ستر او معیاري مسلخونه جوړ کړي دي.
دا مسلخونه، د کابل، بلخ او هرات په ولایتونو کې جوړ شوي چې هر یوه یې په یوه وخت کې د یوزرو ۵۰۰ وریو او وزو او دغه راز د ۳۰۰ غواوو د حلالې وړتیا لري.
د کرنې اوبو لګولو او مالداري وزارت داسې مهال د غوا او وریو د غوښې د تولید د زیاتوالي خبر ورکوي چې لا هم هېواد ته هره ورځ بېکیفیته او حلال شوي څاروي له نورو ګاونډیو هېوادونو راوړل کېږي او په ازاد ډول بازارونو کې پلورل کیږي.