تاند (سه شنبه د حمل ۲۴) د افغانستان د کورنیو چارو وزارت وايي، طالبانو د روان ۱۴۰۰ کال حمل میاشتې په لومړیو ۲۲ ورځو کې له ۶۰ ډېر ملکيان وژلي او له ۱۶۴ ډېر نور يې ټپیان کړي دي.
د دغه وزارت ویاند طارق ارین نن سه شنبه پر خپل ټویټر لیکلي، ددغو پیښو په قربانیانو کې چې ښځې او ماشومان هم شامل دي د طالبانو د ماین چاودنو او بریدونو په پایله کې ورته مرګ ژوبله اوښتې ده.
در ماه مبارک رمضان مردم و حکومت درخواست آتشبس دارند. طالبان برخلاف فتوای علما و حرامدانستن جنگ، اما این گروه به کشتار ادامه میدهد. طالب بر جغرافیای جنگ حاکم نیست، همانطور که بر عقل، دین، ارزشها، اراده و تصمیمگیری حاکم نبوده و نیست و به امر باداران خود باعث کشتار مردم میگردد
— Tariq Arian (@TariqArian3) April 13, 2021
د ښاغلي ارین په خبره د دوی د معلوماتو په اساس نسبت د تیر کال همدې مودې ته اوس مهال د ملکي تلفاتو کچه لوړه شوې ده.
د کورنیو چارو وزارت ویاند وايي، طالبانو په افغانستان کې له نړیوالو ځواکونو سره د اوربند په پلي کولو سره د ملکي وګړو وژلو ته دوام ورکړی دی.
طالبانو تر دا اوسه په دې هکله خپل نظر نه دی څرګند کړی.
د یادونې ده چې ولسمشر غني هم د روژې په مناسبت په یوه پیغام کې پر طالبانو غږ کړی دی چې که سولې ته اراده لري؛ نو د روژې میاشتې ته په درناوي دې اوربند وکړي.
دغه راز په افغانستان کې یو شمېر بهرنیو بنسټونو هم د روژې په مناسبت په خپلو پیغامونو کې د افغان جګړې له ښکېلو لوریو په ځانګړې توګه له طالبانو غوښتي چې د روژې میاشتې ته په درناوي دې تاوتریخوالی کم کړي او په دې میاشت کې دې د بې ګناه ملکي وګړو، خبریالانو، ښځو او د بشري حقونو د مدافعینو له وژلو لاس واخلي.