تاند ( جمعه، د حمل ۲۰) ولسي جرګه کابل ته د پاکستان پارلمان د ریيس الوتکې ته د اجازې نه ورکولو له امله امنیتي چارواکي احضاروي.
د یادې جرګې د دارالانشاء له خوا پارلماني چارو وزارت ته په استول شوي مکتوب کې لیکل شوي: « دا چې د نا معلومو دلایلو له امله د پاکستان پارلماني پلاوي الوتکې ته د حامد کرزي نړیوال هوایي ډګر کې د ناستې اجازه نه ده ورکړل شوې باید اړوند مسوولان یې په اړه وضاحت ورکړي.»
په دې مکتوب کې د کورنیو چارو او ملي دفاع وزارتونو سرپرستانو، د ملي امنیت رییس، د هوایي چلند ادارې رییس او د حامد کرزي هوایي ډګر مسوولانو څخه غوښتنه شوې، څو د ولسي جرګې د ریيس کاري دفتر ته ورشي او په دې اړه وضاحت ورکړي.
په پام کې وه تېره ورځ پنج شنبه د پاکستان د ولسي جرګې ریيس او پلاوی د افغانستان د ولسي جرګې د رییس میر رحمن رحماني په بلنه کابل ته راشي خو د امنیتي ستونزو له امله یې د حامد کرزي هوایي ډګر کې الوتکې ته د ناستې اجازه ورنه کړل شوه.
له دې سره سم تېره ورځ د ولسي جرګې رئيس میر رحمن رحماني په یوه خبرپاڼه کې ویلي چې، ژر به افغانستان ته د پاکستان د پارلمان د رییس لغوه شوی سفر له سره تنظیم کړي.