تاند ( پنجشنبه، د حمل ۱۹) د ننګرهار ولایتي چارواکي دې ولایت کې د وسلوالو طالبانو د ۱۱ کسیزې ډلې د نیول کېدو خبر ورکوي.
د ننګرهار رسنیو دفتر څخه په خپره شوې خبرپاڼه کې راغلي چې د ملي امنيت ادارې له لوري ۱۱ وسله وال طالبان او درې تنه نور مجرمين وسلو او مهاتو سره يو ځای نيول شوي دي.
خبرپاڼه وایي، د ننګرهار ولایت مربوطاتو کې ملي امنيت رياست له لوري يولس وسله وال طالبان د يو کلاشينکوف او يو ماين، يو تن تهديدونکی، او يو تن بل د یو کلاشينکوف، درې تومانچو، ۲۹۴ د کلاشينکوف او پيکا مرميو او شپږو شاژورونو سره نيول شوي دي.
د ننګرهار رسنیو دفتر خبرپاڼه دغه راز زیاتوي چې نيول شويو کسانو په خپلو جرمونو اعتراف کړی چې د قانون له مخې به ور سره چلند تر سره شي.
ورته مهال د ننګرهار ولایتي مسوولین وایي، ملي امنیت د دې ولایت د پچیراګام ولسوالي لپاره د داعش ډلې نوی مسوول ژوندی نیولی دی.
د ننګرهار د والي ویاند عطاالله خوږیاڼی وایي، د ملي امنیت اړوند «۰۲قعطې» ځواکونو تیره شپه د پچیراګام په ولسوالي کې د شپنیو عملیاتو پرمهال د یادې ولسوالي لپاره د داعش ډلې نوی مسوول او د هدفي وژنو ډلې پلان جوړوونکی شاه محمود له د دوو نورو شکمنو کسانو سره یو ځای ژوندي نیولي دي.
د خوږیاڼي په خبره نیول شوي کس په تېر کې د داعش ډلې لپاره په پچیر اګام ولسوالي کې د انتقالاتو په برخه کې هم زمینه برابروله.
وسلوالو طالبانو او داعش ډلې تراوسه په دې اړه څه نه دي ویلي.