تاند (چهارشنبه د حمل ۱۱) د پاکستان حکومت د چينايانو د شرابو جوړولو يوې فابريکې ته جواز ورکړی دی او کراچۍ ته څېرمه په حب نومي سيمه کې يې کار پيل کړی دی.
د راپورونو له مخې دا اوس په دغه سيمه کې د شرابو دويمه لويه فابريکه ده چې کار پيلوي، خو ویل کېږي چې پاکستانيانو ورته ویلي چې جوړ شوي شراب به له پاکستانه د باندې نه خرڅوي.
د پاکستان ګمرکونو ادارې ویلي، د دغه هېواد بیا رغنیزو چارو کې د چینایانو شمېر په ډېرېدو دی او د دوی اړتیا پوره کولو لپاره دا کارخانه جوړه شوې، خو د اوس لپاره به بهر ته نه صادرېږي.
د کوسټل بریوري اینډ ډسټلري لميټیډ په نامه د شرابو دغې فابريکې ته تېر کال د پاکستان اسلامي جمهوريت په خپله خاوره کې د کار جواز ورکړی و چې اوس یې په کار پیل کړی دی.
پاکستاني چارواکي وايي، له دې فابریکې به ځايي خلکو ته کاري فرصتونه برابر شي او ایالتي او فدرالي حکومتون به د مالیې په بڼه عاید ترلاسه کړي.
د قانون له مخې مسلمانان نه شي کولای شراب وپېري او غیر مسلمانانو ته بیا ځانګړي جوازونه ورکول کېږي.
د پاکستان د بلوچستان ايالت د ګمرکونو رئیس محمد زمان خان ویلي، چينايانو د دغې فابريکې په جوړولو، په پاکستان کې درې ميليارده پاکستانۍ کلدارې پانګونه کړې ده.
دده په خبره چې اوس دغه فابريکه يوازې بير جوړوي، خو لږ وروسته به د شرابو د نورو ډولونو جوړول هم پيل کړي او که د پاکستان حکومت ورڅخه خوشحاله شو، د باندې هېوادو ته به يې هم صادرات پيل شي.
د یادونې ده چې همدې حب ښارګوټي کې د کیو ډي ایل په نامه د شرابو جوړولو یوه بله کارخونه هم فعاله ده، چې څو کاله مخکې له کوټې دې ښارګوټي ته راوړل شوې.