تاند(سه شنبه، د حمل ۱۰) د پکتیا د پوهنې ریاست چارواکي وايي، چې نوي ښوونیز کال کې به د دې ولایت په مرکز او ولسوالیو کې ۳۰ زره نجونې او هلکان ښوونځیو کې شامل شي.
دوی له خلکو غواړي هغه هلکان او نجونې چې په ښوونځي کې د شاملولو عمرونه يې پوره کړي وي، د خپلو سیمو په نږدې ښوونځیو کې دې شامل کړي.
بلخوا عام خلک دې کار لپاره چمتوالی ښایي، خو غوښتنه کوي، چې د پوهنې په برخه کې د شته ستونزو هوارولو ته دې پاملرنه وشي.
د پکتیا پوهنې ریاست، مدني فعالانو او قومي مخورو، ددې ولایت په مرکز او ولسوالیو کې ښوونځیو ته د ماشومانو د شاملولو لپاره د عامه پوهاوي کمپاین پیل کړی دی.
د پکتیا د پوهنې رئیس کوچي ځاځي نن رسنیو ته وویل، د دوی د دې کمپاین څخه موخه داده چې د ښوونځي د عمر برابر ماشومان له زده کړو بې برخې نشي او کورنۍ وهڅیږي، چې د خپلو نږدې سیمو په ښوونځیو کې د خپلو ماشومانو نوم لیکنه وکړي.
کوچي ځاځي زیاته کړې، “د پکتیا د پوهنې ریاست د ۱۴۰۰ښوونیز کال لپاره پلان لري، چې ۳۰زره هغه ماشومان چې د ښوونځي عمر يې پوره کړی وي، هغه مو په ښوونځیو کې شامل کړل، چې نیمايي به يې نجونې وي، ددې لپاره دغه موټریز کاروان چې راوتلی، د پټان پوهنیز کاروان په نوم باندې، موږ له خلکو غواړو تر څو خپل ماشومان که نجونې او یا هلکان په خپلو نږدې ښوونځیو کې يې شامل کړي.”
د پکتیا د اوسیدونکو په وینا، که چیرې موږ غواړو په نړۍ کې د یو سیال هېواد د وګړو په توګه ژوند وکړو، نو باید خپل اولادونه ښوونځیو کې شامل کړو.
د څمکنیو د سیمې یو ښوونکی عاشق الله ځلاند هم وايي، چې د یادې ولسوالۍ په ښوونځیو کې د نورو ستونزو تر څنګ د ښوونکو د کمښت ستونزه جدي ده.
نوموړی زیاتوي، دوی په خپل لومړنۍ ښوونځي کې چې تر نهم ټولګي پورې زده کوونکي په کې زده کړې کوي، ۵ ښوونکي لري، چې دا يې یوه بیلګه ده.
د مسوولینو په وینا سره له دې چې د پکتیا په زرمت ولسوالۍ کې له ۶ کلونو راهیسې د نجونو ښوونځي د طالبانو له لوري تړل شوي، خو د پوهنې چارواکي تمه څرګندوي، چې د دوی او د سیمې د مخورو په هڅو به سږ کال یاد ښوونځي بیرته د نجونو پرمخ پرانیستل شي.
د یادونې ده، چې په پکتیا کې ټول ۲لکه ۶۰ زره زده کوونکي په زده کړو بوخت دي، چې ۷۳ زرته تنه يې نجونې دي.
د دې ولایت په مرکز او ولسوالیو کې ۴۱۱ حکومتي ښوونځي او ۴۸ خصوصي ښوونځي فعالیت لري.
سږ کال د پکتیا د ښوونځیو له دولسمو ټولګو ۴۷۸۲ تنه فارغ شول، چې نږدې ۴۵۰ تنه نجونې وې.