تاند ( یک شنبه، د حمل ۸) د اسټرالیا او نیوزیلینډ ښځېنه کرکټ لوبډلو تر منځ نن د مارچ میاشتې په ۲۸مه نېټه د درېیو شل اوریزو لوبو لړۍ پيل شوه.
په دې لوبه کې لومړی نیوزیلینډ ښځينه لوبډلې توپ وهنه وکړه او په ټاکلو شلو اورونو کې یې د شپږو لوبغاړو په سوځېدو مقابلې لوبډلې ته د ۱۳۱ منډو هدف ورکړ.
اسټرالیا ښځېنه لوبډلې ټاکل شوی هدف په اتلسم اور کې د څلورو لوبغاړو په زیان پوره او مقابلې لوبډلې ته یې په ۶ وېکټو په لومړۍ شل اوره لوبه کې ماتې ورکړه.
د اسټرالیا لپاره په توپ وهنه کې اېشلی ګاډنر د ۳ شپږیزو او ۶ څلوریزو پر مټ په ۴۸ توپونو باندې ۷۳ تر ټولو زیاتې منډې جوړې کړې.
د دواړو لوبډلو تر منځ به دوهمه سیالۍ د همدې مارچ میاشتې په ۳۰مه او وروستۍ هغه يې بیا د اپریل په لومړۍ نېټه تر سره کیږي.