تاند (یکشنبه د حمل ۸) د هرات ولایت په ادرسکن ولسوالۍ کې د کندهار-هرات پر لویه لار ترافیکي پېښه شوې ده چې له امله یې پنځو کسانو خپل ژوند بایللی او ۱۳ نور ټپيان دي.
د هرات د عامې روغتیا ریاست ویاند محمد رفیق شیرزي له رسنیو سره په خبرو کې ویلي چې دغه پېښه د ۴۰۴ ډوله مسافر وړونکي او باروړونکي موټر د ټکر له امله رامنځته شوې ده.
د نوموړي په خبره چې ټپیان د درملنې په موخه د هرات سیمه ییز روغتون ته لېږدول شوي دي.
د مسؤلانو په وینا چې دغه پېښه نن سهار شاوخوا ۴:۲۰ بجې رامنځته شوې چې یاده مرګ ژوبله یې اړولې ده.
د کندهار-هرات لویه لار وخت ناوخت د ورته ترافیکي پېښو شاهده وي چې چارواکي یې لامل د موټر چلوونکو بې احتیاطي بولي، خو موټر چلوونکي بیا وایي چې ددې لویې لارې خرابوالی د ورته پېښو لامل دی.