تاند ( شنبه، د حمل ۷ ) د نورستان والي وایي، تمه لري چې د لومړي ځل لپاره به سږ کال دې ولایت ته د تر ټولو وختونو په پرتله د سیلانیانو تګ راتګ کې زیاتوالی راشي.
د دغه ولایت والي حافظ عبدالقیوم وایي، د ملي پارک په توګه د نورستان د ځنګلونو تر اعلان وروسته به لومړی ځل سږ کال وي چې د ډېر شمېر سلانیانو کوربه شي.
د هغه دا خبرې داسې مهال دي چې یو کال وړاندې د نورستان ولایت ځنګلونه د ملي پارک او خوندي شویو سیمې په توګه اعلان شول.
د نورستان والي حافظ عبدالقیوم وايي تېر کال د کرونا ویروس د خورېدو له امله دغه ولایت ته د سیلانیانو تګ راتګ بند شوی و.
د نوموړي په وینا، سږ کال به نورستان ته د سیلانیانو تګ راتګ ډېر شي ځکه تېر ۱۳۹۹ کال د کرونا ویروس د خورېدو له امله سیلانیان نه راتلل.
د نورستان والي دغه راز زیاتوي چې یاد ولایت ته د غځېدلي سړک پخول د دوی په لومړیتوبونو کې دي او ډېر ژر به پرې کار پیل شي.
باید یاده شي چې نورستان د هېواد یو ښکلی، غرنی ولایت دی، خوږې اوبه پکې بهیږي، تازه هوا لري او غرونه او درې یې په شنو ونو پوښل شوي دي.
دا ولایت د طبیعي ښکلاو له اړخه د هېواد تر ټولو ښکلی او نه راسپړل شوی ولایت بلل کیږي.
دا په داسې حال کې ده چې تېر کال د افغان ولسمشر اشرف غني له خوا د نورستان ځنګلونه، د غزني د ناور ولاړې اوبه، د کندز امام صاحب او د تخار درقد ولسوالي د ملي پارک او ندي شویو سیمو په توګه ونومول شوې.