تاند (جمعه د حمل ۶) د افغانستان د ملي دفاع وزارت وايي په کندهار کې د طالبانو له لوري ویجاړ شوی پل د ملي اردو له خوا بیا ورغول شو.
د ملي دفاع وزارت نن جمعه د یوې خبرپاڼې په خپرولو سره ویلي چې طالبانو وړمه ورځ د کندهار ولایت ارغنداب ولسوالۍ اړوند په سرکاري باغ سېمه کې د موټر بم په چولو سره یو پل ویجاړ کړ.
خو د دفاع وزارت وايي چې دغه ویجاړ شوی پل د دفاعي ځواکونو له لوري بیا ځلې ورغول شو او د سوداګرو، د ښوونځي د زده کوونکو او د زرګونو کورنیو د تګ راتګ پر مخ یې پرانیسته.
تر دې مخکې د کندهار د امنیه قومندانۍ ویاند جمال ناصر بارکزي ویلي وو چې وسله والو طالبانو دغه پل د مزدا موټر بم په وسیله د ارغنداب ولسوالۍ د سرکاري باغ په سیمه کې تخریب کړی، خو په وینا یې چې په دې پېښه کې چاته زیان نه دی رسېدلی.
د یادونې ده چې دغه پل د ارغنداب ولسوالۍ شوین، بابر او نور کلي د کندهار ښار سره نښلوي.
څو میاشتي مخکي په ارغنداب ولسوالۍ کې یو بل پل هم په ورته توګه په موټر بم حمله کې تخریب شوی وو.
طالبانو تر دا مهاله د دغه پل د تخريب په هکله څه نه دي ويلي.